Orang Brunei Kuat Komplen kah?

Cuba baca surat khabar orang putih kitani Borneo Bulletin. Aku suka membaca tu ruangan 'Opinion'nya. Tiap ari tiga sama ari anam. Pernah kamu membaca?

Awu... Macam-macam durang tulis sana atu... Boh, kau kenapa? Kan mengomplen ko kah?

Inda eh, sudah nyangku aku suka ruangan atu. Tapi sadar kamu kah? Apakan ertinya 'Opinion' ani?

'Opinion' ertinya pendapat. Mengapakan? Apa lagi salahnya?

Tapi cuba kitani baca banar-banar, bukannya komplen kan tu. Langsung bukan pendapat bah. Kadang kala, ada lah jua pendapat, tapi ani, komplen, komplen, komplen.... Suka pulang ku membaca komplen atu, kadang-kadang rasa ku macam membaca surat layang! Hehehe...

Eh, lain jua kau ani, macam surat layang? Ke arah siapa?

Ah, selalunya 'surat layang' ani ditujukan arah TelBru tah, DST tah, pasal ESpeed tah, ke AstroKristal tah. Inda habis-habis bah, minggu-minggu di baca, sama jua. Minggu-minggu di baca sama jua reply bisdia. "Please come forward and deal with us, etc, etc" (Ertinya: Sila tampil ke depan untuk mentangani masalah biskita... kira-kiranya lah tu), kalau inda atu, komplen pasal longkang teblok tia, inda betabas sana sini... ehh macam-macam lah komplen bisdurang atu...

Awu banar pulang tu, tapi banar jua tu, mun durang komplen sudah ulang-ulang, mun aku bah, puas sudah ku komplen, nada tindakan.... Eh, menulis ku jua ke Borneo Bulletin atu. Kalau kau, cubatah, inda kau garam ati kan tu?

Garam atiiii.... Siapa inda garam ati. Kitani membarai kali ah itu, ini ah... Tapi serbisnya teruk, tantu jua tu jadi kemarahan. Tapi, kan halnya bah, mesti kan kitani tulis di surat khabar. Kalau ruangan atu, ruangan pendapat. Kitani tulislah pendapat kitani, macam kira-kiranya, membagi usulan, untuk kebaikan kitani bah... Jangan kitani menyalah gunakan ruangan atu, untuk kitani melapas kan wap marah kitani. Inda jua bisai tu.

Eh kau ani, mun sudah marah… Inda lagi dapat di tahan-tahan tu…

Nah, atu nah silap kitani orang Brunei, sensitip hantap. Kalau marah akibat kesilapan kah atau sebagainya, kitani inda buleh melenting cematu saja, siasat, tanya, soal, kenapa? Berunding bah kitani. Ataupun, cari cara penyelesaian. Ani nah, unjung pangkalnya, “Please come forward” jua reply bisdia. Nada beza kan? Jadinya apa-apa ani, kitani mesti besabar, bawa berunding.

Sabar?! Sabar?! Sanang cakapnya ah! Kau inda tau masalah orang! Semuanya betunggu kali ah. Orang lain pun ada jua hal, ada jua masalah. Indakan atu saja kitani tangani... Payah kali ah turun naik opis, atu saja kan di layan?...

Banar pulang tu, marah tia kau pulang. Tapi cubatah, kitani tulis ke surat khabar, apa kebaikannya yang dapat kitani dapat ?

Puas hati lah ! Biar ya, biar durang tau !

Eh jangan cematu. Kitani orang Brunei, bebudi bahasa, inda ingin kan menjatuhkan. Lagipun koperat-koperat basar yang di Brunei ani orang kitani jua kan. Mun orang kitani kan menjatuhkan orang sendiri, membaru malu eh. Atu satu ah, yang keduanya bukan cara kitani tu.

Eh, kesana tah pulang kau ani. Tapi lagi sekali, inda ku berapa agree cakap mu ani, pandai kau memutar belit. Macam ular!

Eh, jangan marah eh. Aku atu saja membagi pandangan luar, (outside opinion...) aku tanya arah orang lain ah, apa cakap bisdia nah... Cubatah komen nah...

Ulasan

Catat Ulasan

Catatan popular daripada blog ini

Makin Teruk ah?!

Imej
Kenapa kan baru-baru ani makin banyak tia eksiden? Siapa yang patut disalahkan? Lain jua kau ani, mencari salah? Bukannya mencari salah, tapi di mana silapnya? Kalau kitani tau salah silapnya tau kitani cemana mengelakkan, inda ja? Jaa! Aku ani kadang-kadangnya banci ku kan pemandu kitani di Negara Brunei ani. Bukannya semua lah, tapi secara umum lah. Kurang ajar pemandu kitani ani. Eh kasar tu eh! Ingat kau atu hebat sangat? Ingat kau atu sempurna 'drive'? Sempurna atu inda lah sempurna, pandai jua ku speeding sekali-sekala, tapi aku buleh di katakan behemah di jalan raya. Pasal apa ku berani becakap cematu, aku sayang kan nyawa ku, aku sayang kan kerita ku, bulan-bulan kali ku membayar ah. Bukan sanang. Eh macam tah orang lain inda membayar? Atu banar pulang, orang lain membayar jua, tapi inda penyayang nyawa. Inda penyayang kerita. Kalau inda, kenapa tah durang speeding waktu hujan, waktu banyak kerita. Memutung kerita lain macam inda beumpama. Beumpama bah sama orang ani....
Baca lagi

Soal Hati

Nya dalam hadis dan Al-Quran, setiap yang permulaan, ada pengakhirannya. Tapi masa ani, mulanya blog ani, ada pengakhirannya tentang hidup ku ani. Tapi pengakhiran yang ku lalui ani, pengakhiran yang inda dapat ku elak kan. Walaupun aku yang mengakhirkannya. Terpaksa ku lapas kan. Hatinya terpaut arah orang lain. Bukan pulang di sengajakannya. Tapi terpaut tia. Inda ulah kan. Perasaan orang mana dapat kitani tentukan. Walaupun aku sama ia setaun labih sudah. Kami putus tapi masih kami bekawan. Tapi ani, mun kedia sudah sangkut, inda kan aku melarang. Aku tau aku nada hak jua bah. Kawan ku ada bagitau, kalau aku takut lapas, ambil iya pulang balik. Ada jua banarnya, tapi indakan sudah ada orang lain kan beguna, di ambil tah balik. Kalau aku mau ia balik, aku mau tau yang aku sedia mengambil ia balik. Aku sedia pulang sudah, tapi aku inda tau samada perasaan ku ani di akibatkan oleh orang ketiga atupun banar-banar aku sedia. Sayang ku kan kedia ani, Tuhan saja yang tau. Hati ani sakit me...
Baca lagi

Selamat Hari Jadi dan Tahniah!

Apa tah kau ah ikut DJ ah? Apa lurih mu? Alhamdulillah. Numbur 5 ku dapat, buleh lah tahan, sekurang-kurangnya aku inda menghampakan Mentor ku. Kenapa pulang? Inda jua apa-apa kalau kau inda manang. Aku taget ku, bukan kan manang atau apa, kalau manang, kira bunus lah tu, ani aku inda mau menghampakan mentor ku, kau tau, banyak kali ah usahanya arah kami dua. Ngalih ia bekunyanyang, kami dua ani malu malu campur babal sedikit. Tapi berkat kesabaran mentor ku, alhamdullilah, syukur ku jua... Masa di backstage, aku sama si Q menampar-nampar que kad arah dahi kami, sambil bercakap sorang diri "Jangan hampakan Aliff"... Bongok usul kami dua... At one point, inda lagi kami peduli if manang kah inda, yang penting, kami kan menujukkan betapa hebatnya hasil karya mentor kami... Tuhan saja tau rasa mentor kami atu, untuk kami mencapai yang terbaik... Kami sungguh bangga ada mentor berdedikasi macam ia... hehe... Edeh, siok eh bunyi kau atu? Apa lagi ada? Kalau kan meliat gambar, liat ...
Baca lagi