Lalai, bukan lagi inda lalai

Telalai ku nyamu kan meng-update (mengkemas-kinikan, esewah...) blog Brunei ku ani...  Inda lagi tekabir, tapi inda apa... Kadang-kadang pun jadi tah kan?

So apa yang terbaru, isu-isu semasa aku pun jauh ketinggalan ani wah...  Aku ani sebanarnya nada pulang niat kan menulis dalam blog ani, teliat ku komen dari Kicap Bini...  Nah, gatal tia jua jari-jemari ku ani...  

Sebelum ku kelupahan, SELAMAT HARI RAYA AIDILFITRI, MAAF ZAHIR BATIN ku ucapkan kepada para pembaca blog ku ani, awu, lambat, tapi Hari Raya kan sebulan... balum jua telambat kan?  Hidup ku masa ani, separuh laut, separuh darat, tapi banyak ke laut.  Banyak abis saudara-mara kecarian... rumah terbuka pun ku inda te-aga.  Sibuk, eh bukan sibuk, lalai bah... lalai kan barang lain, abis beciciran.  

Baru baru ani aku ani, becerita sama kawan ku, pasal radio kitani ani bah, orang kan bekurapak cakap bahasa melayu standard.  Aku bukan ku jua apa, sebenarnya, paham ku pulang tu kenapa, tapi nada orang jua kan menyatakan kenapa...  

Bukan inda mau melaung-laungkan bahasa Brunei ani, ada jua bisainya, contohnya, Rangkaian Harmoni, cuba tah di dangari, cakap Brunei tu bisdia, tapi bagi ruangan yang mana orang yang mendangar atu, bukan orang Brunei saja, contoh macam kitani mendangar Radio Indonesia, mun kitani inda paham, behapang kitani kan mendangar, pebaik lawa lagu di mainnya...  Sababnya bisdia atu becakap bahasa melayu standard sebab ianya untuk pendengaran umum.  Supaya, orang paham...  Cuba tah kalau di banar banari bahasa Brunei ani, bukan kan Orang Brunei ada tujuh bangsa...  Cuba tah kalau ku cakap Dusun, paham orang?  Orang dusun paham pulang... Tapi masyarakat umum?  Bukan semua orang Brunei pandai bahasa Brunei, inda jua salah kalau kitani memakai bahasa Brunei, tapi mun ganya kan melaungkan bahasa Brunei supaya lambat laun kitani paham kan bahasa atu... Mun cematu, baik tah di gugurkan bahasa Melayu dari sekulah atu... amalkan tah saja bahasa Brunei.  Macam labih tah jua ku atu... Maklum lah, lama sudah ku inda bekunyanyang...

Kadang-kadang, aku inda paham dengan orang Brunei, yang... bah minta mahap ku dulu banyak banyak... siapa makan cabi, terasa tia tu...  befikiran cetek.  Buka minda atu, sebab menuju jalan yang lurus atu bukan bemakna jalan atu boleh di gunakan... Mun di jalan banyak kerita, tapi di sediakan jalan basikal ganya... sampai bila bila inda dapat di pakai...  Walaupun lurus...  Kediaku ani, inda pulang kan melabih labih... ganya ani pikiran ku, secetek mana pun pikiran ku, pikiran ku ganya...  

Bah atu saja... berinut ku daulu...  

Dygta - Tak Bisa Memilikimu

Bila
Waktuku tersisa
Untuk s'lalu di sisi
Menjaga hatimu

Aku
'Kan s'lalu mencoba
Berikan yang terbaik
Untuk kau miliki

Tapi maafkanlah aku
Waktuku hanya sesaat

Aku tak bisa memiliki
Menjaga cintamu
Walau sesungguhnya hatiku mencintaimu, memilikimu
Aku tak ingin kau terluka
Mencintai aku
Hapuslah air matamu dan lupakan aku

Sendiri
Di batas asaku
Hanya ingin kau bahagia
Jalani hidupmu
Aku kan slalu mencoba
Berikan yang terbaik untuk kau miliki

Tapi maafkanlah aku
Waktuku hanya sesaat

Aku tak bisa memiliki
Menjaga cintamu
Walau sesungguhnya hatiku mencintaimu, memilikimu
Aku tak ingin kau terluka
Mencintai aku
Hapuslah air matamu dan lupakan aku

Makluman

Assalamualaikum,

Si Pengunyanyang sini.  Minta maaf ku banyak-banyak kan kamu, pasal lama sudah inda ku update (mengemas-kini kan) blog ani.  Macam barat sebalah tia pulang ah.  Blog Inggeris ku atu, panuh, kan hari-hari sudah di isi, tapi yang di sini nada be-update.

Bukannya apa, blog ani andang ku sediakan untuk membincangkan dan membuka minda orang kitani.  Tau tah, kitani ani, kalau sudah sanang, di bari payah, inda tia kan bekarih tu lagi, mengumplen tah ganya pemandai bisdia...  Kadang-kadang, kalau sudah hidup sanang, kan berusaha atu jadi malas tia.  Yatah kebanyakan orang kitani ani...  Eh kenapa tia ku bekunyanyang lain ani.  Okey, berbalik pasal kenapa nada be-update ani.  Blog ku yang sebuting atu blog harian ku, macam diary lah.  Yang ani, kira serius sedikit.

Jadi apa cerita kunyanyang terbaru...  Ah pasal Olympik ah.  Awu, tau ku lambat, tapi ada jua baiknya di persoalkan hal atu.  Alasan bisdia, nada atlet kan di antar.  Ampat taun persiapan, dua ratus ribu rakyat kitani (tulak campur lah tu ah), seorang pun nada belurih?  Jadi pertanyaan ku jua tu ah.  Tapi apa jua tau ku ah hal cemani ani...  Atu banar tu.  Tapi dari segi logika (bak kata Agnes Monica)...  Memang tiada logika.  Kana laungkan lagi tu, bejuta rakyat dunia habis tau.  Inda kan membari awar tu?

Okey lah, nada atlet.  Atu semua kitani inda paham.  Tapi mengantar wakil pun nada?  Eh Brunei ani bukan baru ani start ikut.  Dulu pernah ikut, walaupun nada atlet.  Ada bisdia mengantar wakil berharap (eh, macam kad jemputan tu eh).  Ada lagi desas desus mengatakan Embassi China lambat mengantar jemputan...  Eh setau aku, lebih setaun sudah kana laung laungkan Olympik ani, menunggu jemputan lagi?  Minta junjung jua kah?  Nada kah orang kitani yang bersikap pro-aktif mengatakan, "Eh Olympik inda lagi batah, inda kitani mengantar orang kah?"  Atu pun nada kah?  Apatah guna Kounsel Olympic Brunei Darussalam atu?  Masih jua menunggu jemputan?  

Macam macam sudah kitani dangar.  Tapi sayang, nasi sudah jadi bubur.  Arang sudah tepalit di muka.  Nya orang putih "sh!t has hit the fan"...  Hancur.  Aku rasa lah, bukan aku sorang saja yang merasa sedih, hampa, duka dan malu bila kana umumkan yang Brunei di kecualikan dalam Olympik.  Ramai rakyat kitani yang malu mendangar, tarus orang malas kan meliat pebarisan lalu masa pembukaan rasmi.  Walaupun hanya mengusung bendera ke Stadium atu, tapi pengertiannya basar bagi rakyat kitani.  Harapkan pagar, pagar tumbang saja saja...  Hmm, jadi pengajaran kitani lah tu ah.  Bagi bisdia yang terasa padasnya luahan si Kunyanyang ani...  Yatah tu nah, cuba tah pro-aktif dalam menjalani tugasan atu...  Kana bagi masa tambahan untuk mendaftar, masih jua matingal.  Mungkin, sibuk kali di kadai kopi, mengantat, mengambil anak pakah...  Tapi tugasan masih tugasan.  Ibadah bah tu...

Kadang kala, dalam pemikiranku yang cetek ani lah...  Iatah cara pentadbiran kitani ani...  Betabiat...  Barang sekajap jadi dua kajap...  cemana kan tu... eh aku ani labih labih tia pulang...  Bah inda apa lah, apa jua tau ku...  Harap harap, nada yang membaca ani mengambil hati atau tesinggung...  Bukan niat yang sebenarnya kan menyakiti hati sesiapa yang membaca, tapi kan halnya, becerita, bekunyanyang, supaya dapat jadi pengajaran kitani semua...  

Bah atu saja lah buat masa ani, moga terhibur hendaknya.  Wassalam.

Siapa tah di percayai ni?

Sekajap ada, sekajap nada.  Sekajap Halal, sekajap Haram.  Siapa yang patut di percaya?  Siapa yang bertanggung jawap?

Edeh, serious jua bunyi mu.  Membari ijap.  Pasal Pau kah ni lagi?

Inda tah jua lagi.  Membagi orang kitani konpius.

Apa lagi kan kau konpius kan?  Ada-ada saja kau ani eh.

Nya 'sorang' inda halal, nya 'sorang' lagi halal, nada memakai apa-apa.  Jadi pertanyaan jua ku tu, siapa tah ku kan pecaya ni?  Aku takut dengan timbulnya issue ani, soal halal dan haram ani buleh di pertikaikan dan langsung buleh menyesat kan kitani.

Sasat?  Out kau ani eh!  Apa pulang sasat?

Ok, cemani, kalau sudah timbul isu cemani ah, ada yang mengatakan halal, ada yang mengatakan haram, jadi orang jadi serba salah, mana halal atau haramnya makanan atu.  Ani, sekarang semua jadi kemusykilan kitani.  Kitani was-was makanan halal tah pulang jadinya.  Ada orang yang kurang prihatin arah halal haram, pun buleh berfikirian, yang halal pun haram, yang haram memang haram, makan saja lah...  Nah bukan kan menyesatkan tu

Kenapakan?  Kau bepikiran cematu?  Teruk kau ani eh!

Bukan cematu maksudku, maksudku kan, kemusykilan orang tentang haram dan haram ani buleh membuat orang was-was atau ragu-ragu pada perkataan halal ani wah.  Macam perkataan halal ani sudah nada membagi makna bagi orang lagi.  Semuanya haram.  Bukan kan membari ijap tu?  

Banar pulang tu.  Kitani mesti berhati-hati me'label'kan sesuatu atu halal atau haram.  Takut masyarakat kitani keliru, apa yang halal, apa yang haram.  Awu, senuju habis.

Jadi siapa yang kitani patut dangar?  Cakap 'sorang' atau cakap lagi 'sorang'?  Cubatah nah, apa tah tu jadinya?  Orang bedua hati sudah kan ke sana?  

Kalau kau inda mau bedua hati, aku ada cara.

Bah cemana tah, kau yang pintar ah!

Cemani, aku bawa kau jalan, ke nasi katuk yang halal, kau belanja aku...  Ah, tatap tia hati mu kan belanja aku nasi katuk.  Cemana?

Lagi-lagi nasi katuk, banar tah, kalau ada spanar ampai-ampai, ku latuk kepala mu ni banar...  Bah lakas tah...  Pakai kerita mu...  Bari malas kau ani eh...

Eh upah ku bah tu, upah mendangar kunyanyang mu!

Sunyi Jua Kunyanyang?

Awu, sibuk ku masa ani...

Behapa saja kau? Banyak jua kau sibuk kan?

Bukan sibuk saja, banyak lah hal ku masa ani, kau ani kalau paham bisai!

Jangan tah marah nah. Dari kau marah-marah, baik pulang kau belanja kediaku.

Bah laju tah, di mana kau minta belanja?

Bah mana saja, asal kau ikhlas.

Bah mau makan pau? Ha-ha-ha

Eh jangan cematu eh. Cari bah yang halal.

Tapi terpikir jua ku ah, kenapa sampai cematu kejadiannya. Banyak orang marah. Aku lagi dulu suka pau durang atu, tau tah, namanya bun-bun-nan ani... Bun kacang itam atu jua ku suka...

Kanyang tah kau tu makan, nyaman kau!

Eh kasar tu eh. Bukan ku sengajakan. Yatah kadang-kadang terkanang ku jua, aku ani inda pulang warak apa, tapi makan minum ku, ku jaga. Yatah yang buleh menjadi kemarahan orang, sebab yang di makan atu jadi isi daging kitani bah tu. Ibadah pun inda kana terima kan tu. Kesian jua orang tu.

Awu banar pulang tu, tapi sengaja kah usulnya?

Inda ku tau eh. Tapi katakan lah di sengajakan, nah ani jadinya, bisnes buleh lingkup tu. Kalau kan bisnes ani, mesti jua pikirkan akibatnya. Sangka ku inda pulang durang sengaja kan tu... Tapi nyata-nyata ku bagitau, inda pulang ku tau...

Yatah sibuk orang ulehnya, jara tah orang tu kan ke sana...

Awu ah, orang pecaya sudah, ani, payah orang kan pecaya lagi...

Mana tah kau makan masa ani?

Nasi katok lah jawapnya! Ha-ha-ha

Bah ngam! Belanja ku Nasi Katok saja!

Lagi!? Apa nama parut mu ani... Bah lakas tah! Pakai kerita mu ah!

Selamat Hari Jadi dan Tahniah!

Apa tah kau ah ikut DJ ah? Apa lurih mu?



Alhamdulillah. Numbur 5 ku dapat, buleh lah tahan, sekurang-kurangnya aku inda menghampakan Mentor ku.



Kenapa pulang? Inda jua apa-apa kalau kau inda manang.



Aku taget ku, bukan kan manang atau apa, kalau manang, kira bunus lah tu, ani aku inda mau menghampakan mentor ku, kau tau, banyak kali ah usahanya arah kami dua. Ngalih ia bekunyanyang, kami dua ani malu malu campur babal sedikit. Tapi berkat kesabaran mentor ku, alhamdullilah, syukur ku jua... Masa di backstage, aku sama si Q menampar-nampar que kad arah dahi kami, sambil bercakap sorang diri "Jangan hampakan Aliff"... Bongok usul kami dua... At one point, inda lagi kami peduli if manang kah inda, yang penting, kami kan menujukkan betapa hebatnya hasil karya mentor kami... Tuhan saja tau rasa mentor kami atu, untuk kami mencapai yang terbaik... Kami sungguh bangga ada mentor berdedikasi macam ia... hehe...



Edeh, siok eh bunyi kau atu? Apa lagi ada?



Kalau kan meliat gambar, liat saja arah blog inggeris ku... Sana ada gambar kami...



Birthday mu kah kelamarin?



Awu, ada jua celebrate sama housemate ku sama dorang nyanyi lagu besday malam atu jua... Kalau ku ingat, malu ku jua hahaha... karau mua ku rasanya... Tapi besday ani paling meriah, ko tau jua kan, aku ani, keluarga inda beguna kediaku lagi, baru jua putus, inda kana guna jua... Eksiden lagi lapas atu... Macam runtuh semangat ku, jadi dengan dorang ani, kurang lah sedikit kan emosi ku yang terumbang-ambing atu... Happy ku lah, walaupun sementara...



Jeles ku kau ani eh... Eh Happy Birthday ah arah mu... Sorry ah, nada hadiah...



Hadiah inda penting bagi ku, aku sudah dapat hadiah yang terhebat sudah....



Apa tu? Kerita? Rumah? Moto? Apa? Apa?



Ketenteraman hati. Kenalan baru-baru. Hidup baru. Dan sebuah piala saguhati... ha-ha... Inda ku tesabut semua lah... malu ku, karang kedapatan tia kediaku ani jiwa-jiwa... Karang muntah kau..



Mana saja tah kau eh... Asal kau happy and bah, kau birthday ah... Biasalah... Nasi Katok? Jadi?



Inda kurang Nasi Katok nya ani... Ku katuk kau karang... Bah maie tah...



----------------------------------------------------------------------------



Kepada semua yang terlibat, terima kasih banyak-banyak atas kehadiran kamu dalam hidup sang kunyanyang ani... Terima Kasih, sekalung budi, ada masa, hangout kitani lagi...

Eh Jauh tu?

Apa nya yang jauh?

KB, Beliat ah, jauh nya bisdia. Jauh. Tapi ke Miri, cacah cabur. Inda ku paham eh.

Kenapa kau tarus tarus kan becerita pasal KB ani?

Aku hairan bah, kenapa orang kejauhan KB ani, wal hal, kalau kan ke limbang, ke KK, ke Miri, ke Kucing, ke Singapore, ke KL, ke Thailand, ke UK atu inda jauh...

Banar jua tu, jauh. Inda jauh kan? Kalau kau belusir, balum tantu kau sampai ariatu jua.

Atu banar, tapi sebenarnya bukan pasal jauh. Pasal malas.

Eh ke sana pulang kau... Cemana pulang pasal malas... Out kau ani eh!

Orang kitani kebilangan bila di tanya apa ada di Masjid India di KL, tanya saja apa ada sana, tejawap bisdia atu, tanya apa di mana kadai mobail di Singapore, di mana kan membali udang karing di Miri. Tapi tau durang KB ah, tanah air kitani jua tu. Banyak orang sudah sampai di KB... sasat. Konpius. Inda ku paham. Kan memahami tah inda tu, sebab jawapan bisdia, selalunya "Apa ada KB kan? Sunyi atu?" Yatah silapnya tu. Bukan pasal ada kah nada kan di aga, pasal ingin tau negara kitani. Bukan kan kitani ada program Kenali Negara Kitani (KNK) ah. Bah kitani sambut lah KNK atu. Tahun dapan kan Tahun Melawat Brunei. Luangkan lah masa atu mengenali KB atau Tutong kah, maupun Temburung. Mun karang ada pelancung kan datang. Inda tau apa apa, eh membari malu eh.

Jadi orang KB inda cematu kan dengan Bandar ani?

Ah, dua kali lima, sepuluh, inda payah jawap, aku menjawapkan... Sama! Baik inda jauh tu? Yatah yang selalu ku dangar tu. Bayangkan ah. Dialog aku sama orang kitani di bandar... "Kau wang di mana kau keraja sama mana kau tinggal?" Jawapan ku "KB" "Eh jauh tu eh!" Atu yang malar ku dangar. Tampat ku tinggal, tampat ku keraja sama, tapi tatap jua jauh. Inda jauh bah, negara kitani ani damit bah masih. Inda ku ingin tu mendangar. Jauh lagi kitani ke Miri, ke Limbang, ke KK. Bejam jam, ke KB atu lebih kurang sejam, sampai tah kitani. Pemikiran kitani, yang malas atu kadang-kadang tebawai jadi alasan jauh. Sudah jauh pemikiran kitani atu, malas tah kitani ulehnya.

Tapi banar jua bah, jauh jua KB atu. Ngalih bah drive tu. Sangal badan.

Singgah bah ke Tutong, inda salah singgah. Inda keluar passport nyamu eh. Inda payah beque apa endah...

Eh kau ani, inda ku menyangkalkan banar tu, sanang ke KB atu, maupun ke Bandar. Tapi ngalih orang mana kau tau. Bagi ku jauh tu eh. Kalau keluar negeri atu lain lah hal nya. Andang orang kan makan angin.

Apa salahnya makan angin di negeri sendiri kan? Apa kurangnya negara kitani? Dari kitani mengeluarkan duit kitani di luar negeri, kenapa inda di negeri sendiri, kan orang kitani yang maju. Yang untung nya ekonomi kitani. Sebenarnya, banyak kan ku kunyanyangkan pasal isu 'Jauh' ani. Kalau kamu ada masa, fikirkan, "Jauh kah Bandar ani? Jauh kah Temburung ani? Jauh kah KB ani? Jauh kah Tutong ani?" Pikirkan baik baik, lapas atu kamu komen balik dalam blog kunyanyang ku ani... Banar kah inda jauh?

Awal awal ku membari tau kau... Jauh! Bah belanja ku makan, lapar ku ni, nasi katuk ada buka masih ni... Lapar parut ku, haus lihir ku melayan kau ani...