Lakas tah bekunyanyang kitani

Paning ku paning. Sasak jua ku. Banar tah membarikan menumbuk bah. Eh kenapa lagi ni? Bukannya apa, cubatah kau, sakit hati kali kau ah. Berapa kali sudah ku kana . Apakan yang kau rancau-rancaukan ani, cuba tah bekunyanyang bisai-bisai. Minta maap ku kan kau wang eh. Aku atu meliat wayang ari atu, sekali atu, orang di belakang ku ani, tetandang-tandang bah. Inda kau sakit hati kan tu? Inda jua mengapa tu, tagur pulang ia bisai-bisai. Entah ah, hating ku atu marah sudah, takut ku jadi kurang ajar karang. Tapi cubatah beumpama sama orang. Wayang atu lagi membagi paning. Tapi inda pulang ku paning banar pasal atu. Beterima kasih jua ku pekerja di wayang atu, durang 'warning' pulang kami. Tapi kan halnya ani bah. Kenapa orang tetandang-tandang atu. Inda ku basanang wah. Hari atu sama jua kau, sampai kau taguri... Awu, apalah nasib ku ani kalau meliat wayang gerenti kana tandang-tandang kerusi ku atu. Entah ah, inda ku tau... Sabar saja bui. Awu ah sabar, tapi kesabaran ku ani ada ...

Kesian ku meliat bandar ah. Awu, hari atu, ku raun, dui ma, rawan hati ku meliat bandar atu sunyi sepi. Ingat ku lagi masa ku damit, masa pasar masih di sana arah tapak parking betingkat atu, eh punya meriah. Atu baru ya. Kenapa iya sunyi atu kan? Mana silapnya? Boh, start tia ni kan menyalahkan ni... Bekunyanyang tia ni... Tau ku ni... Jangan tuduh-tuduh ani deh. Tapi banar pulang ku kan bekunyanyang... ahaks! Bah, kenapa nah, kenapa sunyi? Eh aku betanya, ditanyanya ku balik! Kau ani tah! Kau kan tau kenapa sunyi... Ani sebabnya 'planning' inda menjadi. Yatah tu nah. Maksudmu? Macam-macam inisiatif sudah durang buat, termasuk memperbesarkan tempat berjalan, membisaikan kawasan bangunan kastam atu, lawa eh, bisai pulang banar. Tapi inda memikirkan apa kesannya ke arah kawasan atu. Nada, apa nya urang, nada perbincangan bah. Yakan tu? Pasal atu tah bisnes banyak lingkup ah. Nada interaksi kali di antara komuniti sana atu dengan pihak yang bekuasa. Yatah tu. Tapi ada kebaikannya...

Eh lama sudah kau inda bekunyanyang ah! Awu, gagau saja ku masa ani, kau ada kan kau kunyanyangkan? Ada pulang tapi inda ku taip masa ani. Eh kenapa pulang? Laptop ku, ku jual. Kan membali laptop baru ku. Ni nah bank ani, betabiat tia jua mengantar aku 'cheque' pakai ku kan membali. Me'loan' kau kah? He he - Awu. Astah, adang luan eh. Banyak loan mu sudah? Sadang. He he.. Bah... Adang tah kan menambah hutang. Bukan ku inda menyuruh. Tapi kesanangan mu jua tu. Lalai kau membayar hutang, baik pulang kau membelanjai kediaku. Kau jua kan! Akhirnya! Baik jua tu bepahala.. Bah adang eh... Nanti nanti lagi ku bekunyanyang kan kau ani! Karing pulang lihir ku...

Bagus tia balik eh JP ah. Pasal 'Light Festival' kah? Pigi kau sudah? Awu, banar eh, atu baru ya, meriah tarus ani bah di JP atu, sampai panuh parking. Kau sudah ke sana? Balum pulang ku ke sana, sebabnya tau tah, gagau kan kanak-kanak sekulah ani. Sebenarnya ah, aku ani kan bekunyanyang sikit, buleh kah...? Bah selajurkan tia, kenapa lagi? Aku sebenarnya ah, ku puji berabis yang 'organise' (lupa namanya) festival cahaya di JP atu. Atu baru namanya inda hipokrit. Eh siapa yang hipokrit? Inda ku paham cakap mu ani... Ingat kau dulu, balik-balik orang kitani menulis dalam surat khabar kitani, yang JP atu nada be'maintain' tah, terbiar tah, nada orang peduli tah. Tapi ah, cemana kan JP atu balik ke gemilangannya dulu, mun orang kitani sendiri inda 'support'! Sudah di tanya karang, sudah ku main mainannya, boring, sunyi, malas ku ke sana... Jadi, kalau bukan orang kitani yang 'support' bisnes JP atu, cemana kan iya maju? Awu banar tu, kadang-ka...

Apa yang kau kunyanyangkan kali ani? Pasal orang kitani bah, bukannya apa, pasal bunus ani bah jua yang menyebabkan ku tepikir... Lagi-lagi bunus, apa lagi kan kau ani, macam marah saja kan orang bebunus... Bukan ku marah. Tapikan, cemani, bunus ani banyak orang riuh, sibuk shopping, membali naendah apa... Jadinya kan, inda ku salah mengatakan, orang brunei ani banyak kerja dengan kerajaan inda? Lurus, jadinya... Bah liat pentadbirannya... lambat, betabiat, inda efisyen, nya orang... Inda ku paham eh maksud mu ani... Kalau kebanyakan orang kitani keraja sama perkhidmatan awam kitani, buleh ku angarkan dakat semua, tapi semua process betabiat... Apakan tu ertinya? Patutnya, kalau kan dikirakan, inda sepatutnya cematu kejadiannya... Ani ah, semua orang mau kana layan bisai, teratur, capat, efisyen, tapi kitani sendiri inda melayan orang cematu... Puas ku mendangar orang komplen, orang kitani ada yang kasar, malah kurang ajar, inda beektika dengan lurus... Tapi mau kana layan dengan lebih...

Selamat Tahun Baru 2008 ku ucapkan arah pembaca-pembaca kitani dalam kunyanyang ani. Bagi bisdia yang inda menyambut tahun baru, ku ucapkan selamat hari Selasa. Jadi dalam tahun baru ani aku cuba menjadi positif sikit untuk orang kitani, insyaallah untuk memberi semangat dan manfaat untuk pembaca kitani. Tapi kadang-kadang inda dapat bah disangga mulut ani dari kan bekunyanyang tah ganya. Sekiranya ada pembaca kitani yang tersinggung jua, minta maaf ku banyak-banyak. Kitani sama-sama memperbisaikan apa yang inda bisai. Kitani sama-sama memperbaikan apa yang inda baik. Kitani sama sama menegur salah silap kitani semua demi kebaikan. Yang penting hujungnya, kita menjadi diri kitani yang lebih baik untuk tahun baru ani. Bak kata pepatah AF (yang taun-taun lapas) "Saya akan cuba lakukan yang terbaik!" Ikhlas, Si Pengunyanyang...